Veitur‎ > ‎Erlent efni‎ > ‎

Þýskaland íhugar að þjóðnýta hluta bankakerfis Þýskalands, þrátt fyrir evruaðild

posted Jul 20, 2009, 4:49 AM by Gunnar Rögnvaldsson   [ updated Jul 20, 2009, 7:37 AM ]


Virkar evran ekki í Þýskalandi?   

Samkvæmt dagblaðinu Sueedeutsche Zeitung gerir þýska ríkisstjórnin sér nú grein fyrir að núverandi björgunarpakkar til handa þýskum bönkum munu ekki bjarga þýska bankakerfinu. Því íhugar ríkisstjórnin nú að þjóðnýta hluta af bankakerfi landsins með valdi. Sinnaskipti ríkisstjórnarinnar segir blaðið að eigi rætur sínar að rekja til bráðaangistar fjármálaráðherra Þýskalands, Peer Steinbruck, sem óttast að yfirvofandi lánsfjárþurrð í Þýskalandi muni hafa neikvæð áhrif fyrir ríkisstjórnina í komandi sambandsþingkosningum þann 27. september

Sagt er að þeir björgunarpakkar sem sendir hafa verið til þýskra banka hafi verið “ókeypis” og muni ekki gagnast landinu neitt og alls ekki auka framboð af lánsfé 

Ef þessar fréttir reynast réttar munu bankarnir verða þvingaðir til að taka á móti fjármunum frá ríkinu - sem þannig mun eignast ráðandi hlut í þeim - og því á pólitískan hátt geta þvingað og stýrt útlánastarfsemi þýskra banka. Stjórnmálamenn verða þá settir við útlánastýrið í stað bankamanna. Evruaðild virðist ekki hafa hjálpað Þýskum bönkum á neinn hátt hér. Undarlegt. Skyldi þetta hafa getað gerst undir Deutsche Mark í höndum Deutsche Bundesbank. Einhvernveginn efast ég stórlega um það. Efast mjög mikið 

Í grein minni Seðlabankinn og þjóðfélagið sem birtist í Þjóðmálum síðasta vetur fjallaði ég meðal annars um samskipti seðlabanka Þýskalands við stjórnvöld og stofnendur myntbandalags Evrópusambandsins

Ég held að mér sé óhætt að fullyrða hér að samkvæmt stjórnarskrá Þýskalands er þjóðnýting banka bönnuð með lögum þar í landi. Nema að þessu hafi verið breytt nýlega

Þess er einnig hægt að geta hér - heilum 10 árum eftir að myntbandalaginu var ýtt úr vör - að samkvæmt hagstofu Evrópusambandsins er meðalverðbólga á evrusvæði nú neikvæð um 0,1%. Þetta þýðir að ennþá uppfylla aðeins 6 af 15 löndum evrusvæðis þá skilmála sem settir voru í upphafi fyrr inngöngu inn í þetta myntbandalag. En það voru skilyrðin um að verðbólga mætti aðeins víkja um 1,5 prósentustig frá meðalverðbólgu þeirra þriggja ríkja með lægstu verðbólguna. En þessi þrjú ríki eru:

  1. Írland með -2,2% verðbólgu (verðhjöðnun)
  2. Portúgal með -1,6% verðbólgu (verðhjöðnun)
  3. Spánn/Luxemburg/Belgía öll með -1,0% verðbólgu (verðhjöðnun) 
Í Lettlandi fellur verðbóga nú um heilt prósentustig í hverjum mánuði 

Eurointelligence








Tengt efni
Björn Bjarnason sunnudaginn 19. júlí 2009
Kosið verður til þýska sambandsþingsins 27. september og er því spáð að kristilegir demókratar CDU/CSU sigri og er talið líklegt, að þeir myndi stjórn með frjálsum demókrötum, FDP, að kosningum loknum. Í utanríkisstefnu FDP kemur fram áhugi á því, að Ísland gerist aðili að Evrópusambandinu í því skyni að treysta og tryggja aðgang ESB að norðurskautinu. Carl Bildt, utanríkisráðherra Svía, hefur einmitt sagt, að hann ætli að „selja“ Ísland innan ESB með vísan til norðurskautshagsmuna ESB.
Comments